الحامض الحلو

واحده من صحباتي لقتها بتقولي الا يا بت يا هوبتي ايه اكتر حاجة وحشاكي في مصر؟؟ قلت ليها اقولك بصراحة ... قالت لي طبعاً قلت ليها بدلع خمني يا حبي!! قالت لي اكيد احنا صحباتك !! قلت ليها هو اكيد انتم وحشتوني طبعا بس مش هو دا اللي واحشني قوي في حاجة وحشاني اكتر منكم بصراحة ... حاجة مهمه بالنسبالي قالت لي طيب ايه هي؟؟ 

الشطاف... ايوة متتصدموش الشطاف ... الشطاف وهو بيضرب في الشرج بصراحة وحشني ام الاحساس دا اصل الحمامات هنا نظام اوروبي او امريكي الشطاف في حته والكابينيه في حته تانية واوقات ممكن تدخل متلاقيش شطاف اصلا وعليك بستعمال المناديل.

المنادل زاي الفل بس مش زاي الشطاف برضك الاحساس غير والشعور غير كمان ويقينك غير ... اهو في حاجة محدش يعرفها عني ومحدش بياخد باله منها الا لما بيركز معايا وهي ؟؟ اني الحبه بعملها قوبه بجانب ان اي حاجة صغيرة بعملها كبيره ولو سمعت عن مرض بعد اهيس مع نفسي انه اكيد المرض عندي اعوذ بالله يعني ... ولمعرفتي وايقاني وايماني باهمية التشطيف وعارفه ان الشطاف مش زاي الشطاف بتاع مصر هاااااااااايح ايااااام يا جدعان فا بقي عندي احساس طول الوقت ان انا هامرض يا هيجيلي بكتريا يا هايجي مرض بسبب ام الشطاف دا.

فعلا بجد يعني تخيل الماية مش قوية اصلا + ان ممكن انت تستعمله وغيرك يستعمله ومش عارف الاخر دا عنده ايه؟؟ هاتهسهس ولا مش هاتهسهس؟؟ هاتهسهس طبعاً

البت لما قلت ليها البوقين دول قالت لي هو مين معايا؟؟ قلت ليها انا هوبتي يا بنتي في ايه مالك؟؟ قالت لي طب لو انتي هوبتي قولي لي حاجة احنا الاتنين بس نعرفها محدش تاني يعرفها ... اعدت افكر في حاجة انا وهي بس نعرفها المشكلة اني ملقتش حاجة انا وهي بس نعرفها او عملاناها مع بعض ابعد من كلامنا علي النت او الموبايل وخروجة يتيمه اتقابلنا فيها... اكتشفت ان وجودي في مصر كان خلف الاسوار وان وجودي جوه مصر زاي وجودي باره مصر محدش حس بغيابي او قربي الا ناس تتعد علي الصوابع 

بصيت لتاريخي معاها فعلا فعلا مفيش ذكريات مفيش احداث مفيش اكشن... لما عملت كتابي الاول الكل سالني ليه عملتيه؟؟ قلت ليهم لاني قرأت رواية الزنبقة السوداء وكان في جملة علمت جوايه كان البطل بيقول انه هيصنع الزنبقة دي لانه مش متزوج ولا هو كاتب ولا هو محارب ولا هو فنان عشان يؤرخ التاريخ والزمن اسمه بسبب الجملة دي فهمت يعني ايه اكون بنت ومبقتش عايزة امر مر الكرام علي الدنيا بقيت عايزة اسيب حاجات مش حاجة شايله اسمي حتي لو كانت مش حلوة في البداية ماهو مع الوقت الواحد بيتعلم. 

13 سنة في مصر ونسياً منسيه واللي يعرفني يعرف عني خيالات ... من كام يوم واحد كنت اعرفه في مصر قالي انتي يا هوبتي كنتي وهاتكوني مجرد حلم لناس كان حلو ولناس كان صعب ... هاتكوني طول الوقت الحاجة الحلوة اللي كانت في ايدينا وضاعت ممكن نندم شوية لكن هنبقي عارفين ان زايك هيجي لان اكيد اللي خلقك خلق غيرك بس طعمك هو اللي مش هايتكرر الحامض الحلو.

كنت بقوله ان كل اللي عايزاه اني مكونش مجرد حلم لناس كتيرة لكن عايزة اكون حقيقة لحد ... لشخص واحد هو كمان يكون حقيقتي ... عايزة حد يعرف معدني الحقيقي من البداية مش لازم اضيع منه او منها عشان يعرفوا انا مين؟؟

عايزة حد يشوف قاعي ويتمسك بيه بدون ما يعد ينقي يقول لاء انا عجبني دا فيها ومش عجبني دا لاني مش كده مش بحب اعد اقول انا عجبني في الانسان دا ومش عجبني دا لاء بقبله كده بنت كان او ولد معنديش فرق بين خيار وفقوس.

انا كده هاديه وشعنونه بكون متهوره وهادية بكون ذكية وساذجة وغبيه في نفس ذات الوقت انا كريمة جدا وبخيله في نفس ذات الوقت ... انا اللي بثق قوي في الناس وفي نفس الوقت الشك بيقتلني انا كده ... انا الخجولة والجريئة وانا اللي اي حاجة ممكن تكسفني لكن بجحه ساعات كتيرة بجد انا اللي بزعل ان وزني زايد لكن مقدرش ابطل اكل بطاطس... انا اللي بتحب كل اصحابها وبتغير عليهم جدا لكن لما بزعل من حد فيهم ببيع ومبيكونش صديقي تاني وحسب قوة الزعله وشكل الخصام ...هي دي انا اقبلني هيك.