ابقي قابلني

صبرت صبرت وكان الصبر أسمه أيوب وانا هوبتي او هبة الله او مهراجا لكن مش أيوب لا كان في يوم وصفي او اسمي او من عيلتي والله اعلم باللي في القلوب. 

من فترة وانا مش بتوقف في الشغل كتير وبحاول الاقي حاجة كويسة ارتاح فيها نفسياً وتريحني وسدد اتحياجاتي وربنا اكرمني بحد يحاول يساعدني في الموضوع المهم الراجل دا بقي كل ما يبعتني عند حد يبعتني عند ناس غلط من وجهة نظري انا الشخصية لكن من وجهة نظره هو قد يكونوا ناس صح لانهم رافعين شيعار الله في قلوبنا وباين علي هدومنا... ما علينا كل دا خش عليَّ بالذاااااكي يا برنس ... في الاونة الاخيرة فعلا فعلا فعلا اقتنعت اني لازم اكتب رواية جديدة زاي " هبة الله وبن ميدلر" اللي الحمد لله اكتر حاجة قدرت اوضحها في الرواية دي وبشهادة الشهود اني قدرت اعرض النفس البشرية بين اتنين اصحاب وان ازاي لو وصلت بيهم الصداقة للقمة الا ان النفس البشرية الأنا موجودة لسه ولازم اعرض الموضوع دا بشكل جديد ومفيد المره دي ويشوف النور بطريقة صح غير المره اللي فاتت. 

كمان اقتنعت ان مهما عاشرت الا انك بتكتشف خامة ومعدن الناس بالمواقف برضك الراجل دا مكتشفش الناس دي او بعضهم الا عن طريقي ... واتصدم فيهم وبقي مكسوف قصادي مع انه مش لازم يخجل لانه ملهوش دعوة هو يعرفهم من باره مدخلش جواهم ولا مره... احنا دايما دايما دايما بنعرف الناس وبنشوفهم زاي ما هما بيصوروا نفسهم يعني انا صورت نفسي غبيه هبقي غبيه في عينيك صورت نفسي محترمة هاكون محترمة في عينيك لو صورت نفسي متبدلة الاقنعة هاتعرف اني بمليون وش وشكل والناس بطبيعتها بتتلون من موقف لاخر حسب قوة احتمالها.

في شركة هنا اسمها بيتر هوس ولا بيتر هوم حاجة زاي كده بيدوروا علي كول سينتر قلت وماله اروح ... روحت ليهم اول ما لقيته بدقن وبص لي بصة ابو لهب لما محمد نزل بدين جديد في قريش قلت في نفسي الباطينية يااااااااااااااااااااااااااااااااااااااااالهوي طارت الشغلانة وبقيت بغني في سيري انا عايز اروح والامل يرد عليَّه متروحشي ... لا انا مروح ... متروحشي . المهم اعد وجاب لي واحده بشوشة واول ما قالت لي خبره ... قلت ليها انا معنديش خبره بس عايزة اتعلم مش عيب يعني والراجل سألني كنتي بتشتغلي فين في مصر اول ما قلت له مزيكا ونايل سينما قالي عند كل الفلول وراح فاتح ملف رابعه ... سيدي الفاضل لمعلوماتك الفلول هما الناس اللي كانت مع مبارك وضد الثورة لمعلومات بس ... واعد يقولي الناس اللي ماتوا في رابعة 15 الف شهيد والاعلام قال عليهم ارهابين قلت له الاعلام عامل زاي الشعب والجهة الحكومية الملكية ماااااات الملك عاااااش ام الملك الجديد واهو كله بيطبل في كله لكن انا يا استاذي العزيز مليش دعوة انا مال اهلي؟؟ انا اردنية انا حتي في مصر كنت معروفة باسم " هبة الاردنية " يالي سخرية الزمن في مصر " هبة الاردنية " ويوقوا لي ارجعي بلدك وهنا " هبة المصرية " ويقولوا لي ارجعي مصر ... من كام سنة مكنش عندي لا هوية ولا شهادة ميلاد وحالتي كانت بالبلاء الازرق وكنت عماله ألطم ان ممكن ميكونش عندي وطن او مكان اروحه واليوم أكتشفت اني مواطن بلا وطن ... هوية وجنسية بلا روح بلا جسد .. وكأن التغريبة كتبت يوم ولدتني امي ... لاء دا من يوم ما قالت لابي قد زوجتك نفسي. 

المهم وبقي عمال يقولي انتي مع الاخوان ولا ضددهم طب انا شكلي باين اصلاً اساساًُ ان انا لا اخوان ولا علمان انا بلا اتجاه سياسي حضرتك اهلي لما بدات اشد طولي قالوا لي متتكلميش في السياسة ولا تختاري حزب تنتميى له لحسن تروحي خلف الشمس وتخدينا معاكي احنا مغتربين في بلاد الله الواسعة ولو في بلادنا مش ناقصين معتقلات ... 

اعد يكلمني عن اللي ماتوا في رابعة من الاخوان اكتر ما كلمني عن العمل ... دقنه واصله لكرشه ومحولش يفتح معايا حوار واحد بس عن العمل وكل ما اغلق باب الاخوان يفتحه علي العرض والطول ... ارهقني وخلاني مش طايقة نفسي. 

استاذي العزيز الملتحي اللي كنت بتتكلم عن الشهداء بحرقة دم متحرقش دمك ليه وانا جايه اطلب شغلانة بالحلال؟؟ وهل الحلال لازمله هوية اخوانيه ؟؟ سيدي العزيز اللي كنت بتحك في لحيتك وبتكلمني ليه انا متبرجة علي فكره عينيك كانت علي صدري ... سيدي اللي اعدت تسألني عن اهلي ... يا تري علاقتك باخواتك ازيها؟؟ ... سيدي اللي بصيت لي بشمئزاز لاني مش محجبه كان هايكون حلو لو انا محجبه زاي الاخت اللي بتشتغل عندك بس بنطلوني ضيق وبلوزتي مكسمة وحاطه مكياج في وقت انا كنت جايه بدون مكياج لابسه طويل وواسع ... سيدي اللملتحي ابو كرش اللي اعد يدافع عن الاخوان والشهداء اللي ماتوا في رابعة ... عملت ليهم ايه حضرتك ؟؟ اخدت البندقية ونزلت علي مصر عشان تحرر الاخوان من العلمانين ؟؟ بعدين تعالي هنا ياض انت عارف انك اردني وهما مصرين يعني اصلا اساساً انت مال اهلك بيهم ؟؟ نخوه اتجاه اخوك المسلم طب وسوريا وقبل سوريا لبنان وقبل لبنان فلسطين؟؟ فين دول من نخوتك علي اخوك المسلم ولا اخوان مصر مسلمين وكل المسلمين والعرب اللي في الدول دي كفار مثلا؟؟ 

كنت من كام يوم في مناقشة مع جاره قديمة ليَّ من سوريا بقول ليها الناس غريبه اهو كل ما اروح مكان الاقيهم اخوان وكل ما تروحي مكان تلاقيهم فلتانين ... مينفعش يحصل ميكس يعني ؟؟ انا مره فلتان وانتي مره متشدد؟؟ يعني تغير ... حاسه ان الدراما بجد بتبذل مجهود عنيف عشان تكون في حياتي ... حاسه انها بجد بتحاول بكل قوة انها تكون في صميم حياتي وانا نفسي في شوية هدوء.

عايزة ابعد عن الناس اعمل زاي روبارت لما هاجر وراح وساب بلده واختزل العالم كله وعاش في مكان بعيد نفسي اعمل زايه بس مش بايدي يخريب بيت طبع اهلي عيشاريه فوق الحدود يعني.

نفسي ارتاح بدون موت ... نفسي مشوفش كل كام يوم صورة حد من اصحابي مات كفاية اللي ماتوا في التحرير والاتحادية والالترس ورابعة ... ااه بمناسبة اللي ماتوا اعذائي الاخوان المسلمين في اي دولة عربية خارج مصر ... الاخوان طلع ليهم حس وصوت بعد الثورة بعد ما المصرين لبسوا الخزوق واختاروا مرسي اهو دا اكتر حاجة مستفزياني كل ما اسأل حد انت اللي صوت لمرسي يحلف لي مليون يمين انه مصوتش لا لمرسي ولا لشفيق طب كسب ازاي؟؟ مين اللي صوت يا جدعان ... ارواح الشهداء واذ اتذكر ويخطر في بالي مشهد من فيلم اسماعيل يس وهو بيقول متكونش شوكلاته دي مش حشيش ويروح واكل قرص الحشيش .... المهم في ناس ماتت في التحرير قبل ما يكون في مرسي واخوان ومسيحين وعلمانين ومثليين ازعلوا عليهم شوية وحياة ابوكم وابكوا عليهم ... دا راح فيهم كتير اكتر من بتوع رابعة الجثة اللي كانت بتتلقي لا كنت بتعرف دي لمسيحي ولا مسلم. ومتنسوش لا اكراه في الدين... وتعلم من رسولك مش هاقولك اكتر من كده وخفوا علينا بقي شوية لحسن كفرتونا حرام عليكم وبأذن الله وانا في الاخره مش هاقول اني مسمحاكم انا هسامحكم في الدنيا لكن مش هسامحكم في الاخرة لاني غلاوية وبنت كلب.

هااااه بقي بس وابقوا قبلوني في الاخر .