قناع واحد يكفيني

صباح الخير ... او مساء الخير بحسب التوقيت المحلي لحضرتك.

وحشوتني لاء بصراحة وبحق وحقيقي وحشتوني ... ووحشني اني افضفض معاكم.. حياتي مشحونه فشخ جدا بدرجة ان صدقة ليَّ من سويسلاند قالت لي انها اول مره تعيش الاجواء دي مليون حدث في الفسوه الواحده.

في الكام اليوم اللي فاتو كالعاده اخدت نفس ام القرار اني لازم اعمل استوب واعمل اكشن في حياتي علي اساس ان حياتي نقصها اكشن؟؟ لاء نقصها ان انا اللي اخد الاكشن مش الاكشن هو اللي يجيلي لحد عندي بصراحة. 

كل يوم حد يقولي اتعلمت منك حاجة جديدة ... اتعلمت منك شئ ... بس انا مش عارفه اتعلم مني يعني لما ببصلي كده ببقي مش شايفه غير متاهات في متاهات. 

نفسي يكون عندي حاجات كتيرة ... يكون عندي البرنامج بتاعي اللي بتنشق عشان اعمله بجد ... نفسي يكون عندي قلب كبير يساع كل العالم وخصوصي المشردين والحيوانات المشردة بصراحة اصلهم صعبانين عليَّ واحده اوكرانية اتعرفت عليها لقتها بتقولي ان كلبها بيتقطع لما بتشوف قط او كلب متشرد طب قلبك مبيتقطعش لما بتشوفي طفل متشرد؟؟ لما سألتها السؤال دا هي مردتش عليَّ ومش عايزاها ترد عليّ لانه مش مهم انها ترد عليّ انا المهم ترد علي نفسها هي!! 

نفسي يكون نفسي طويل اصل في الفتره الاخيرة بقيت بحس انه بيتقطع بسرعة الخيط وهو ملزوق في العجينه

نفسي أصبر عليَّ الشخصيات اللي بقابلها اصبر علي الناس اللي بتدور علي عبيد تستعبدهم عندهم مش بيكونوا خلية نحل وكله يشتغل ... نفسي أصبر علي النفسيات المريضة اللي معندهاش غير انها تحرق دم الاخر وتنتف في سرته ... نفسي بجد يكون نفسي طويل علي الناس اللي بتدعي قربها من الله وبتتشرط قربك من ربنا عشان تشغلك ... بقالي فتره بدور علي شغل في مؤوسسات محترمة واخر مكانيين روحت عليهم قالوا لي الاتي .. واحده قالت لي ان اول الشهر احتمال ابدأ والتانية قالت لي لازم اتحجب ... قلت له اوكي هاتحجب جوه الشغل ... قالي لاء تبقي محجبه جوه وباره الشغل عشان سمعت المؤوسسة ... اصل لو اتحجبتي هنا وروحتي خلعتي الحجاب وحد شافك هايقول علينا ايه؟؟ مصدقيتنا هاتروح في الارض.

الموقف دا فكرني وانا بمصر بالمحلات والشريكات اللي كانت بتتشرط علي البنات انها تخلع الحجاب عشان تشتغل فكرني بالناس اللي واخده زبيبة الصلاة والحجاب علامة عن التقوي والايمان في وقت انهم بعيد قوي عن القلب.

ماهو في مليون واحد مربي دقنه وعنده الزبيبه لكن قلبه ما يعلم بيه الا الله ومليون واحده بتمشي بقصير لكن قلبها ما يعلم بيه الا الله ... الحجاب او الزبيبه أصبحت علامة عشان يقول انا مسلم وهي تقول انا مسلمة زاي المسيحين في مصر لما بيلبسوا الصليب او بيدقوا الصليب علامة مش محبة ... عشان يعرفوا بعض زاي اليهود في امريكا لما بيلبسوا الطقية اللي معرفش اسمها ايه دي او بيدقوا النجمة او بيلبسوا النجمة عشان يقولوا نحن هنا ... نحن جماعة مش اقليه ... هل اصبح الانتماء لدين او الايمان بكتاب مقدس بالملابس؟ هل اصبح الرزق بالملابس؟؟ يعني عشان اشتغل معاهم معده او مذيعة لازم اكون محجبه او منقبه ... عشان اكون مذيعة تليفزيون لازم اكون رفيعه وشقراء ... طب ايه لزمة ام الخبره وسنين الخبره والجهد والمجهود اللي بعمله مادام كله واقف علي شكلي؟؟ 

من فتره اتعرفت ببنت انجليزية من اصول هندية من عائلة مسلمة اعدت اتكلم معاها عن حياة المسيحين والمسلمين واليهود في اوروبا ... اعدت تكلمني عن صحبتها اللي بتشتغل في مطار انجلترا وهي محجبه ومحدش بيقولها حاجة وان فرنسا دولة وانجلترا دولة اخري ... واتكلمنا عن المسيحين في انجلترا وان كتير منهم مبقاش مؤمن ولكن لما بيشوفوا حد ملحد وبينكر وجود الله بيقلب الموضوع معاهم شخصي عندهم مشكلة ان يكون في بني ادم ملحد لكن المهم يكون مسيحي ولابس الصليب وعادي بس مش مهم يروح الكنيسة زاي المسلمين اللي هنا مش مهم يصلي مش مهم يروح الجامع كل يوم ويمكن يروح يصلي جمعة اه وجمعة لاء بس المهم بناته تكون محجبات ... المهم ان بناته مكمكمين في البيت ... مش مهم ايه يعني انه يشتم بالفاظ وحشه؟؟ ماهو مسلم وكده كده هايتعذب شوية وبعدين يدخل الجنه لانه بس بيقول الشهادة ... ايه يعني يبص بصة طويلة علي جسم بنت حتي لو هي مغطيه نفسها ... ايه يعني انه يدخن ويشيش او يأرجيل ماهو عادي مدام لا بياخد مخدرات او حشيش يبقي اوكي .... ايه فيها ايه لما يتشرط انه يشغل محجبات في شركته عشان سمعت الشركة لكن مش عيب انه يتفرج علي افلام سيكس او يلمح لواحده انه تعبان جنسياً وعايزها ... ايه يعني يكون بيصلي الفرض بفرضة بس ميقبض موظفينه في مواعيدهم ويديهم اقل من حقهم زاي انه يقول ليهم هاتشتغلوا من 8 الصبح لحد 6 ونص بليل بس 180 دينار وان كان عجبك عجبك لو مش عجبك خلاص. 

الناس اللي زاي دي هي اللي بتخلي العالم اللي زاي حلاتي يتصدموا في ايمانهم ورحمة الله وقوته ... الناس اللي زاي دي بتخلي شباب يروح يبيع مخدرات او يسرق او بنات تبيع نفسها. 

الناس اللي زاي دي مش فهمه يعني ايه " لا اكراه في الدين " اكيد في فروض وان كل دين وله فرضه وسنته وشريعته ولكن مش كل الناس بتطبقها ودا عادي لانهم ناس لكن اللي مش عادي انك تفرضها علي غيرك ومحرمها علي حالك ... اللي مش عادي انك تنادي بيها وانت لاعنها بنفسك. 

في ناس بتكفر باللسان وفي ناس بتكفر بالقلب وفي ناس بتكفر بالاتنين. 

وانا مش عايزة اكون اي حاجة مما سبق ذكره ... مش عايزة اكون منافقة ماهو نفاق اهاجر من حياتي اللي الله من اجل عمل ؟؟ اعمل الفريضة عشان ربنا ولا عشان عمل ؟؟ فكرني لما كنت قصاد خالي اروح امثل اني بصلي وانا مكنتش بصلي كنت بس بقف وعد اعد من 1 لحد 100 او افكر او اكلم نفسي واقوله اه صاليت لما كنت قصاده وقصاد العالم البس حجاب بس علي ايميلي حاطة صورتي بشعري ... فكرني لما كنت بحاول اوريه ان انا اهو بحاول افهم ديني وكل ما اقرا فيه شوية اكتشف غباء البشرية.

مش عايزة اكون كده تاني مش عايزة اكون بمليون وش وقناع يكفيني قناع واحد.