بصراحة انا بحلم كتير بحلم ان يكون عندي برنامج تليفزيوني خاص بيا أنا ويكون عندي رسالة ارسلها بعد اقول لنفسي كتير طب ليه لحد لوقتي محصلش؟ ببساطة لان معنديش رسالة ايه هي الرسالة اللي انا عايزة اوصلها للعالم ؟؟ كله يحب بعضوا؟ طب ما هو كله بيحب كلو وكلو بيخزوق كله مهو البني ادم منينا حلو ووحش في نفس ذات الوقت.
من الحاجات اللي اتعلمتها من اني اسكن مع زميلات سكن ان ممكن كتير تلاقي ناس معتمده عليك وانت ممكن تعتمد علي حد وممكن تلاقي اللي يشيل معاك.
اكيد بتعصب جد لما بلاقي حد معتمد عليا اعتماد كلي وهو في الاساس متفق معايا نص بنص + انه ميفكرش حتي يقولك انا حاسس بيك فاهساعدك لاء دا بيخبي عليك كويس... انا مش هفتح في الموضوع دا كتر لان انا بذات نفسي ساعات بكون كده وبعتمد علي الاخر لكن الحمد لله مش بخبي حاجة والحمد لله ومش هتكلم عنه لان ممكن الاخر او رفيقة السكن دي متفهمش انا بتكلم عن ايه؟ لان للاسف كلنا كا بشر بنشوف الاخر عمل ايه؟؟ لكن مبنحولش نشوف احنا بنعمل ايه؟؟
الحياة بسيطة جدا وكل يوم بتعلم بساطتها وبحاول علي قد ما اقدر امشي بمبدأ هاكونا ماتاتا
والموضوع دا بدا يكبر معايا بعد ما تعاملت مع ناس اسمهم مجموعة الكاوتش سيرفينج ودول ناس بتسافر من بلد لبلد وبدل ما يروحوا يأجروا اوتيل او شقة ممكن ينزلوا في بيت اسرة او حد ويناموا علي الكنبه.
" أجنيس "
أجنيس بنت عرفتها من الموقع دا كنت اول مره انيم حد في بيتي كانت المفروض جايه تعد عندي 5 ايام بس وال5 ايام دول قلبوا شهر ... الحمد لله قدرت اديها صورة حلوة عن العرب وتحولت اجنيس من مجرد بنت مسافره بتدور علي كنبه لصديقة واخت في فترة قصيرة يوم عيد ميلادي جبتلي سشوار هدية بصراحة كانت حركة رائعة منها كل مره استعمل فيها السشوار دا افتكرها ومش بس كده حطينا خطة ان احنا لازم نتقابل في الصيف دا ونسافر اي مكان حلو سوي.
اجنيس اخدت مكان كبير في قلبي بس مش اكبر من مكان بسمة ... كان معظم الوقت بتكلم عن بسمة مع اجنيس ومع اي حد لاني علطول لبسه سلسلة فيها اسمي واسم بسمة مع بعض من الفضة ... للحظة اتمنيت ان كل بنت قابلتها تلاقي بسمة بتاعتها.
وقدرت اكون بسمة لأجنيس لمدة شهر.
"كيت "
برضك عرفتها من الكاوتش سيرفينج مكنتش بتدور علي مكان تعد فيه قد ما كانت بتدور علي ناس تخرج معاهم انسانة رائعة جدا برضك يوم عيد ميلادي اهديتني ريد واين كانت مفجأة اول مره تجيلي هدية زاي كده بصراحة ورقصنا سوي انا وهي واجنيس وايرا وكلهم من الكاوتش سيرفينج
حبيت شعرها الطريقة اللي بتعمل بيها شعرها ... حبيت روحها وصراحتها ووضوحها.
حبيت وقفتها جمبي لما اكتشفت ان في ناس كنت فكراهم اصحابي طلعوا زباله ... بصراحة انا اكتشفت ان كل اللي كنت بقول عليهم دول اقرب ناس ليا في 2013 ... 2014 اقنعتني انهم ازبل حاجة وانا ملزقاهم فيا .
"ايرا"
ايرا برضك كانت بتدور علي صديقة هنا والحمد لله احنا اصحاب بحب اتكلم معاها بحب ارقص معاها بحب اعلمها عربي ... بحب اشوفها واسمعها وادردش معاها في حاجات كتيرة.
" التجربة "
هي مش تجربة واحده هي عدت تجارب مع ال3 بنات دول مش عارفه ازاي هاتكلم عن الموضوع دا لانه صعب وفي حاجات شخصية .... من الحاجات المستفزة بالنسبة ليا وبالنسبة لاي حد عربي انه لما يعرف حد من اصحابه علي بعض وطرف يحاول يسرق الصديق دا منك زاي مثلا ان ناس المفروض اصحابي وانا اللي معرفاهم بصحبتي يقوموا يتصلوا بصحبتي ويقولوا ليها تعالي نخرج وميفكروش يكليموني انا؟؟ طب في ايه؟؟ مالكم ؟ والمشكلة ان لما يشوفوا خلقتي يعدوا يقولوا خلينا نعمل حاجة سوي وبمناسبة نعمل حاجة سوي كانت صدمة للبنات يا حول الله يا رب لما يقبولوا حد ويعد يخطط ليهم لخروجة او لشئ وفي الاخر الانسان دا تاني يوم كان الكلام كان مدهون بزبدة طبعا هما كا اجانب كان الحوار دا جديد عليهم اما بالنسبة ليا كان عادي ما انا في الاردن ودا بيحصل يعني وبالنسبة ليا انا كووول انا فاضيه فا اي خطة هايعملوها هاروح معاهم شغال حتي ولو كانت رحلة ماكوكية علي جهنم وهذا ما حدث .
رحلة جهنم ... كنت خرجه انا والبنات وبنات اردنيات معانا وشباب المفروض انهم اصحابي كنت فكراهم اصحابي وانا ممنونه للرحلة المكوكية دي عشان اعرفهم علي حقيقتهم.
اولا الرحلة انقسمت علي يومين اليوم الاول كان نايت كلاب روحنا واعدنا نرقص ونهزر ولقينا واحد من اصحابنا متجوز بيبوس واحده وناقص ينام معاها يعني وهي سكرانه طينة والبنت وهي معاه في العربية كانت بدات تفوق بعد ما رجعت وسمعته وهو بيتكلم مع صديق المشكلة انه كان مبين انه لطيف وحبوب وانه صاحب صحبه وانه جدع ولو وجد اي بنت او اي شاب في مشكلة هايقف جمبه لكن الولد او الشاب اللي بالمواصفات دي عمل ايه؟ اتفق مع صحبه انه عادي مادام البت سكرانه مش هتاخد بالها ومش هاتفتكر وكان من حظهم الهباب انها بدات تفوق وطلع الولد بيديله حباية فيجرا ولا مخدرات مقدرتش تركز هو ايه اللي ادهوله بالضبظ بس علي الاقل عرفتهم علي حقيقتهم وعرفت الاخرين علي حقيقتهم انهم وسخين.
في المجتمع الشرقي جابوا الغلط علي البنت لكن في المجتمع الغربي جابوا الغلط علي الشاب قالوا هو متجوز ومكنش سكران يعني مفيش مبرر انه كان يعمل كده اما بالنسبة للتاني فا اكيد لانه ضعيف الشخصية ولا يستحق انه حد يكون قريب منه والناس لازم تعرفه من باره لباره بس لان وقت الخطر هو هايعرض الاخرين ونفسة للموت.
الرحلة التانية لما انا شخصيا وقعت فيها والكلاب الشرسة طلعت تجري ورايا وانا كنت حكايلكم عنها قبل كده.
لما ببص لليومين دول بعد اقول دا لو حصل في تليفزيون الواقع هايقولوا دا فيلم؟؟ او القناة مدبراه.
برضك من الحاجات اللي 2013 و 2014 اكيدتلي عليها ان في بني ادمه في حياتي او هما الصراحة اتنين ميعرفوش يقولوا الحمد لله وبعدين يسألوا نفسهم ويسالوني ويسألوا ربنا هو ليه بيحصل فيهم كده؟؟
البطره عندهم مش عجبهم حالهم مع انهم احسن من غيرهم انا بصراحة الشخصيات اللي زاي دي مبحبش اتكلم معاها مبحبش اعرفهم لان كلامي خسارة فيهم اصلا وبيصدعوني علي الفاضي.
وانا مش ناقصة صداع احب اقول للناس دي هاكونا متاتا بقي.
